جميع الحلقات تاع المسلسل

أهلا بيكم للمسلسل اللي حقق مليون زيارة في أول شهرين من نشرو على فيسبوك، مسلسل القصة الكاملة لعمر تاع كتاب القراءة.. إذا كنت مالناس اللي تبعوه أكيد راك تسقسي علاش ما كملتش فيه؟ الجواب بسيط: الله غالب... مين ذاك القراية، ومين ذاك الخدمة، ومين ذاك السماطة والكرهة... بصح خلاص
غير ما حكا معايا واحد صاحبي وقالي راني نستنى فالمسلسل في رمضان... أنا قلتلو لازم نكمل واش عندي باش نبدا في رمضان سيزون جديد
مالا قررت باش نرجع بحلقة كل أسبوع، وإن شاء الله تبقاو تبعو كيما كنتو تبعو
المهم إذا هذي أول مرة راك تشوف فالمسلسل، ولا شفتو وتحب تعاود تشوفو الحلقات كامل تلقاهم هنا بالترتيب

الحلقة التاسعة والعشرون: الكابوس المرعب

بعدما ابتعدنا شوية في اليامات اللي فاتو على الطاليان... اللي مارانا عارفين عليها والو من وقت عرفنا بلي الطايواني بيع سكوفيلد وعمر بلي راهم يحفرو... وانتهت بأخذه الى عوانتانامو نجو لحلقة اليوم اللي رايحة ترجع بينا للحبس حيث رانا رايحين نعرفو الحقيقة الكاملة تاع واش صرا في هذوك اليامات.

سكوفيلد ماولاش يرقد... لدرجة ولا يهترف... ولات تتخلطلو وماولاش يعرف اذا راه راقد ولا نايض... ميت ولا حي.. وكامل هذا الشي ما التخمام... ولا يشوف أمور غريبة... تتخلطلو... ولا يحس روحو مرات خرج مالحبس... ومرة الداخل... ولا يقول كلام واحد ما يفهمو... ولا يهدر فالمنام... وقلق عمر اللي كان راقد قدامو واللي قال لازم نشوف واش بيه.

عمر: سكوفيلد... سكوفيلد... نوض خويا.
سكوفيلد: اسم الله الرحمن الرحيم... اوه ذاتس يو عمر... خلعتني.

عمر: واش بيك... هذو يامات راني نشوف فيك ماشي قووود... غير الخير؟
سكوفيلد: اوه ماي براذر عمر... راني في حالة.

عمر: احكيلي خويا... ما تخبيش.
سكوفيلد: راني نشوف منامات ماشي ملاح... نايتمارز ماي فريند.

عمر: ايه باينة... انت غير يحطولنا الماكلة تطيح على هذيك اللوبيا كي هذاك اللي عمرو ما شاف.
سكوفيلد: بركانا عمر... يو ناو ماكلتهم ايز نوت ديليشوس.

عمر: الحمد لله اللي ماشي ديليشوس... لوكان راك كملت على الطبسي والمغرف.
سكوفيلد: والله راني هبلت مالتخمام... راني حاب نعرف كيفاش نهربو

عمر: كيفاش نهربو؟ ما تقوليش درت في رايك؟
سكوفيلد: كاش ما بقى راي، ياخي طايواني مايك ايت بينا.

عمر: مايك ات بينا؟ واش راك تخلط؟
سكوفيلد: بووووووه عليك ماي فريند... واقيلا ماراكش مليح... نسيت بلي بيعنا.

عمر: بيعنا؟
الطايواني: شكون هذا اللي بيعنا؟

وهنا يلتحق الطايواني بالجماعة بعدما يكون كمل السيونس تاع الحفير تاعو... وسط دهشة سكوفيلد... اللي تحلب لعمرو بلي كثر اللوبيا هذاك النهار... وولا يهترف بطريقة تخوف.

888888888888888888888888888888

-->

عمر: واش بيك سكت؟ في واش بيعنا؟
سكوفيلد: اممممم اممممم بيعنا بلي رانا حابين نديرو اضراب باش ما يزيدوش يديرولنا اللوبيا.
الطايواني: انا بياع؟؟؟ والله غير تزيد تعاودها غير نكسرلك هذاك الماوث فهمت ولا؟

سكوفيلد: ههههههههه ام جاست كيدينق طايواني... يو ار رجلة تاع الصح.
عمر: ماديرش عليه رضا... راهي صارعاتو اللوبيا ...اسمع سكوفيلد خويا... استغفر وشهد وروح ترقد... وغدوة نهدرو... ونقص علينا الشخير تاعك رحمة على يور ماذر.

وهكذا تحلب سكوفيلد لروحو بلي الطايواني ما بيعهم ما والو... برك هو اللي كان ضاربلها زوج طباسا لوبيا... وحمد ربي بلي البريزون برايك على الطريقة الازوطية ما فشلش... واش راهو رايح يصرا في الحلقات القادمة؟

الحلقة الثامنة والعشرون: السيناريو الحقيقي لفيلم عمر وسلمى(مع تامر حسني).

كيما عرفنا في الحلقة اللي فاتت بلي سلماء السلفية اللي هي في الأصل سلمى فا اليكول اللي كانت (والله أعلم إذا مازالت) طايحة في عمر ازوط، انضمت الى تنظيم الراقدة في بلاد المغرب الإسلامي واطلقت فتوايها المشهورة على الطواغيت اللي يسمعو الغنا بالايبود ويركبو فالبنتلي وياكلو الكافيار، واللي بسبة الفتاوى تاعها دارت أزمة حيث أصبحت المطلوبة رقم واحد عند أمريكا، اللي قررت تديرلها الشونطاج، خاصة وأن ماضي سلمى فا اليكول يؤكد بلي هي ماشي بنت الحلال اللي يحوس عليها عمر.

-->

نجو لحلقة اليوم اللي رايحة تكشف عملية الشونطاج اللي راه حاب البيت الأبيض يديرو لسلماء، حيث تحصل بوراك بوعمامة الرئيس الامريكي على لقطات حصرية من الفيلم الممنوع من العرض اللي تورناتو سلمى فا اليكول مع تامر حسني، وهو فيلم عمر وسلمى( حتى فالفيلم دارت صاحبها يسموه عمر) وهذا الفيلم كتبو السيناريست المجهول بعدما حكاتلو سلمى فا اليكول سيرتها الذاتية، والحياة اللي كانت تحلم(احلمي ياخي باطل) تعيشها مع عمر ازوط، وبلا ما نحكيلكم الفيلم واش فيه، الفيلم معمر بالقبلات والأحضان الساخنة مع تامر حسني، حيث أن سلمى فا اليكول وبلا حشمة كانت كي شغل ماشي تمثل، كي شغل عايشة الدور صح، وهذا هو الشي اللي خلا المخرج يعجب بيها، ويزيد يطوللها فالدور تاعها.

والمشكل أنو الفيديو اللي تحصل عليه بوراك بوعمامة... فيه لقطة مش ولا بد، وبلا ما نحكيلكم الصورة نقولكم الحوار اللي دار بين عمر تاع الفيلم اللي هو تامر حسني وسلمى الحقانية اللي اتضح انها تتقوعر كأية موسطاشة فالدزاير برك، حيث أنها فالدزاير تهدر اون فغونسي بصح في مصر تحكي مصرية نورمال:

عمر: انا بحبك يا سلمى.
سلمى:وانا كمان ياعمر.

عمر: انا عايز اتجوزك يا سلمى.
سلمى: مش لما تحوش المهر يا عمر؟

عمر: مهر ايه يا حبيبتي؟ انا ابويا عندو شركات اد الدنيا، انتي بس تأشري، عايزة كام مليون؟ اتنين؟ انا قاهز يا عمري.
سلمى: لا أنا مهري عايزاه من التحف النادرة يا عمر.

عمر: تحف؟ ومالو انا اشتريلك الاهرامات يا سلمى
اسمحولي خاوتي نقول حاجة قبل ما نكملكم الحوار...تفو عليك يا الحلاب
سلمى: اهرام؟ هاهاهاها انت عايز تضحك عليا؟ لا أنا عايزة حاجة اغلى من دي... انا عايزة مطاوي وسنق وسكاكين من بتوع السودان.

عمر: سودان؟ مانتي عارفة يا حبيبتي انو ما قراش حاقة فالسودان؟
سلمى: اللي اولو شرط اخرو نور ومهند، انت قلت تقيبلي مطاوي وسكاكين من الماركة بتاعت عمرو أديب ولا مافيش قواز.

طبعا الكل راهم مصدومين كيفاش السيناريست المجهول يتورط في أمور قليلة الادب كيما هذي، ومع شكون؟ مع سلمى فا اليكول؟ لكن الصدمة الأكبر هي الحوار السخيف اللي كتبو على أساس أنو مشهد حب بين عمر اللي مثل دورو تامر حسني وسلمى فا اليكول، المهم ماشي هذي هي حكايتنا المفيد بوراك بوعمامة بعدما تحصل على الفيديو حس بلي دار لافار، وبدا يقول لروحو بلي لاعبتها مدينة وهي مفسدة أمة؟ وقال هاهاهاهاههاهاهاهاههاهاهاه اي ويل مايك شونطاج فور يو سالما... يو ويل ريقرات اول ذو ثينقس تاع الشر اللي درتيهم ان يور لايف.

وهكذا بدا بوعمامة يفكر بالاستعانة مع مستشاريه فالطريقة اللي يفضح بيها سلمى فا اليكول الفضيحة اللي تحرقها وتخليها ماتزيدش ترفد وجهها.
ما الذي سيحدث؟ ابقاو معانا ورايحين تعرفو قريبا مزيد من الأحداث

الحلقة السابعة والعشرون: أسامة بن أوباما

بعدما قعدنا فترة طويلة ما عرفنا عليها حتى خبر ، تقريبا مالحلقة السابعة عشرة اللي عرفنا فيها بلي هربت مالسبيطار في حطة تاع فرملية، وتوجهت إلى جدة اللي استقبلتها كيما استقبلت زين الهاربين، وعرفنا كذلك بلي ولات سلفية وبدلت اسمها ورجعاتو سلماء ووجهت رسالة لخاوتها باش يتوبوا، واكتشفنا عبر موجز الأنباء اللي عرضاتو قناة الجزيرة بالاشتراك مع قناة ازوط تي في بلي سلماء انضمنت لتنظيم الراقدة في بلاد المغرب الإسلامي،نجو لحلقة اليوم اللي رايحة تكشف لنا المزيد من التفاصيل

-->

سلماء بمجرد انضمامها إلى تنظيم الراقدة، أصحبت مفتية للجماعة واعلنت الجهاد على من أسمتهم الطواغيت...والطواغيت حسب سلماء هوما الناس اللي يسمعو الغنا بالايبود لانو هذا تطبيع مع امريكا في وقت المقاطعة، ويشرو السيارات الأمريكية والفرنسية في الوقت اللي قادرين يشرو فيه مرسيديس وفولكسفاغن وبي ام واودي تاع لالمان اللي قتلو اليهود أعداء الله، ويتفرجو ام تي في فالوقت اللي قادرين يشوفو ميلودي تتحدى الخلل، وياكلو الكافيار بالموس والفرشيطة فالوقت اللي قادرين يغمسو فيه بالمطلوع، ويضيعو الوقت في اللعب بالدومين فالحومة في بلاصة لعب كونتر سترايك فالدار، والى غير ذلك من الأمور اللي تشوفها سلمى فا اليكول، اقصد سلماء السلفية من موجبات اقامة حد الخروج عن جماعة الراقدة، ودرات حدود كثيرة لمن يتجاوز هذا الأمر أهمها الإعدام بشرب الزنجبيل حتى الموت، وهذا الدستور اللي دارتو سلمى دارلها شعبية في فترة قياسية خلاتها المطلوب رقم واحد لدى الإدارة الأمريكية اللي دارت مكافأة تتمثل في دعوة لشخصين، لحضور حفل ليدي غاغا مع الشاب يزيد في لاكوبول نهار عيد المرأة، وهو الأمر اللي ردت عليه سلماء بدعوة لحضور حفل زفاف بن لادن زعيم تنظيم القاعدة على طفلة يمنية في سن أحفادو بأحد كهوف تورا بورا... ويجب التنويه بلي تنظيم القاعدة والراقدة ماشي كيف كيف بصح عندهم علاقات طيبة
وهكذا شعلت المنافسة بين القاعدة والوايت هاوس من سيفوز أسامة أم أوباما؟... المهم

واش هو المهم؟ المهم وصلنا تسجيل صوتي لأحد جلسات الفتوى اللي ديرهم سلمى فا اليكول للأخوات المتجبللات(ماشي المتجلببات ماتفهمونيش غالط المتجبللات هوما اللي طلعو للجبل ومذكره متجبلل) في الجبل وماراناش حابين نصدموكم نحطولكمواش فيه، لأنو في تقديرنا فيه ضلالة كبيرة، حيث أن الفتوى ولات ساهلة واللي يجي يفتي، على صعيد آخر بدأت السي اي اي في جمع معلومات عن سلماء أقصد سلمى فا اليكول تشمل الحطة اللي كانت تضربها، ومغامراتها العاطفية حتى تديرلها بيهم الشونطاج عبر نشرها في مواقع عديدة

مالذي سيحدث في الحلقات القادمة؟؟؟ ترقبوا ورايحين تعرفو

الحلقة السادسة والعشرون: الصفحة المزورة في كتاب القراءة

بعدما عرفنا في الحلقة الماضية بلي مخلوف البومباردي اتفق مع سبيد ريسر باش ينفذ عملية اغتيال عمر ازوط في مقابل أنو يشريلو ماروتي جديدة، وهذي العملية اللي فالاصل حاب البومباردي يديرها تنفيذا لطلب سلمى فا اليكول باش تديرلو الحملة الانتخابية تاعو اللي راهو مترشح فيها مع منافسين صعاب هوما ساركوزي أوباما وبوتفليقة، نجو لحلقة اليوم ونزولا عند رغبة لي فان تاع الصفحة، اللي رايحة تكشف واش صرا بالضبط نهار الحادثة تاع ازوط

--> نهار الحادثة تاع ازوط كان نهار جمعة، مالا عمر راح عند دار عمو كيما العادة باش يفطر عندهم، باسكو هو يحب الطعام باللبن اللي ديرو مرت عمو، مالا كي لحق لقا وليد عمو رضا يضارب مع واحد الراجل كان مقاري عند الدار ومخرج راسو مالتاقة تاع الطوموبيل، قالو راك تكحل عند دارنا، والراجل يقولو راني مقاري وخلاص، مالا عمر قال لرضا وليد عمو ايا خلينا منو ايا نطلعو للدار، رضا قالو اواه نديرو فيها بارتية خير

الراجل بقا مقاري ماحبش يروح وغير لقا عمر جا من جهة الطريق راح يجري ليه بالطوموبيل وضربو، طبعا هذا الراجل ماجاش باش يكحل، كان هو سبيد ريسر اللي بعثو البومباردي باش يقتل عمر

بعد ما ضربو وهرب، ورضا اللي ماقدرش يشد الماتريكيل تاع الطوموبيل تاعو، بدا يعيط للدار وهو مشوكي، والحومة كامل سمعت وعيطو للبومبية باش جاو داوه لمصطفى باشا وهو في حالة خطيرة جدا

طبعا الحلقة تاع اليوم مافيهاش هدرة بزاف لأنو الصورة هي اللي تتكلم، بصح حبيت نديرلكم تنويه بلي هذي هي الصفحة الاصلية اللي كانت في كتاب القراءة ، قبل ما تنحيه اللجنة العليا للمحافظة على العقلية تاع المصاغر اللي عينتها وزارة التغبية والتسميم باش تحذف أي حاجة من شأنها انها تسوفج الولاد، وتخليهم يديرو سلوكات غير حضارية، كالقتل من اجل الماروتي

المهم تبعو الحوار اللي راه فالصورة اللي حصريا راهي في صفحتناـ وما تديروش على الصفحات لخرين اللي راهم ينشرو فالحلقات باسمهم هذوك سراقين

فالحلقة القادمة نعود الى سلمى فا اليكول... اقصد سلماء السلفية لنتابع أخر التطورات بعد انضمامها الى تنظيم الراقدة في المغرب الاسلامي اللي عطاها رتبة مفتية الجماعة

الحلقة الخامسة والعشرون: مرخس الماروتي

بعدما عرفنا في الحلقة الماضية انو مخلوف البومباردي حكا مع سلمى فا اليكول باش تديرلو العملية الانتخابية، وقالتلو بلي لازم يقضي على عمر ازوط باش تديرهالو نجو لحلقة اليوم اللي رايحة تكشف مزيد من التفاصيل.
المهم البومباردي ربع في لرض تاعو اللي ورثها على جدو الحركي... قاعد يخمم تحت الشجرة تاع التفاح واش يدير يقبل ما يقبلش شوية جاه الرقاد... وقتاش فطن؟ فطن كي طاحت عليه حبة تاع تفاح فوق راسو... البومباردي حسب روحو نيوتن كي اكتشف الجاذبية، وارشيماد كي اكتشف الدافعة... ولا يجري فالدوار ويقول لقيتها لقيتها(كي شغل اوروكا اوروكا وجدتها وجدتها).
كي لحق للبيرو تاعو جبد التلفون وعيط لسائق معروف اللي هو مايكل شوماخر وجرا بيناتهم الحوار التالي:

-->

البومباردي: ياو قوتن طاق عليك مايكل ياو كي راك؟
شوماخر: وعليك القوتن طاق... واش راك سي مخلوف لاباس؟ ما تقوليش راك هنا؟ ايه علابالي بيك مواللف تجي لالمانيا وما تعيطليش يا نكار العشرة.
البومباردي: ياو ما تبداناش... راني غير فالدزاير... ما بوجيتش.
شوماخر: خير مالا... ماشي موالف تعيطلي مالدزاير... موالف كي تكون هنا وما تعيطليش يا واحد المزير... غير باش ما تجيبليش الفريك والمرمز تاع شربة رمضان... علابالك ملي بطلت السوقة دورتها تبزنيس... راني نتربع في السوق تاع ميونيخ مع العجايز ونبيع الفريك والمرمز والقصبر والمعدنوس.
البومباردي: بطلت السوقة؟
شوماخر: ايه علاش ماعلابالكش.
البومباردي: اسمحلي خويا شوماخر جاتني دوزيام ابال من بعد نعاودلك.

طبعا البومباردي ما جاتو لا دوزيام ابال لا والو، كي عرف بلي
شوماخر بطل السوقة، قال مارانيش رايح نقضي معاه صالحة مالا نكوبي خير ملي ياكلي ليزينتي خاطر يهدر بزاف... شكون شكون شكون ياربي؟
البومباردي قاعد يخمم شكون هذا اللي يعيطلو... اه تفكرت غير هو اللي يسلكني.
البومباردي فورما النيميرو وعيط لسبيد ريسر بطل السباق.

البومباردي: هالو سبيد، واش راك قود؟
سبيد: ام فاين مستر بومباردي، هو ار يو؟
البومباردي: والله غير لاباس... اي نيد يو في واحد الحاجة ايرجون رحمة على والديك.
سبيد: ايام هير مستر بومباردي، واش خصك؟

البومباردي هنا بدا يشرح لسبيد ريسر الخطة تاعو اللي رايح ينفذها باش يقتل عمر ازوط بطوموبيل، وكان لازملو فيها سائق محترف، وسبيد ريسر اللي كان لاعبها مستر هيرو ويدافع على المظلومين وافق في مقابل أنو البومباردي يشريلو ماروتي جديدة.
هذي هي التفاصيل تاع عملية ازوط كشفناهالكم كاملة...

ترقبوا بقية الحكاية قريبا حين نرجع الى سلماء السلفية وعمر ازوط وسكوفيلد ونعرفو مصير خربوشة وتامي طبعا... مفاجآت
عديدة في انتظاركم.

الحلقة الرابعة والعشرون: المكالمة السرية

بعدما عرفنا فالحلقات السابقة بلي لانسبكتور ولابرانتي وصلو لنتيجة أنو طرطور خاطيه قضية ازوط، خاصة لما كشفلهم كونان حقيقة دراهمو اللي ربحهم في سؤال المسابقة الكبرى اللي كان حاجة سودا صغيرة وبتطير، وجاوب نملة شاربة ريد بول وربح 90 ألف دولار، وبعدما تعمق لابرانتي في التحقيقات داخل كتاب القراءة وصل لنتيجة أنو القاتل المأجور اللي خلصاتو عائلة فا اليكول باش يقتل لابرانتي هو من خارج كتاب القراءة.
وهذي الشخصية ببساطة وبدون مقدمات: مخلوف البومباردي!

-->  

مخلوف البومباردي اللي كان في وقت من الأوقات منتحل شخصية طبيب في فيلم الطاكسي المخفي، بلاشك راكم كامل متفكرين القرجومة والرينكس فرينكس، لقى بلي السوق تاع التداوي بالأعشاب ولا صعيب، خاصة لما دخلو فيه ولاد خيرة اللي يداوو الناس عن طريق تعليق حبة قمح في وذن المريض، وهي الطريقة اللي داواو بيها وليد وردية هذاك الطويل الله يرحمها فالفيلم، قلنا بعدما لقى بلي الدعوة ماهيش تمشي قرر يترشح للرئاسة بعدما نحى الطربوش وبدلو بعمامة باش واحد ما يتحلبلو، طبعا الباباراتزي تاعنا ما يراطيش وكلشي راه عندنا فالأرشيف، لاعلينا.
المهم مخلوف البومباردي اللي ترشح كونتر أوباما وساركوزي وبوتفليقة ، كان لازم عليه يدير حاجة اللي بيها يربح الفوط ويولي رئيس جمهورية كتاب القراءة، مالا فكر في حملة انتخابية كبيرة تضمنلو الفوز على هذو المرشحين الأقوياء، وماكاش خير من عائلة فا اليكول اللي ممكن تعملو الحملة الانتخابية، خاصة وأن عائلة فا اليكول فيها بزاف لي ستار... فيها نسيم ايمينام اللي يغني الراب ومعروف في سيدي يحي والأبيار وحيدرة، وكاين نبيل الكابتن ماجد الشومبيون تاع حومتو، ومرشح بقوة باش يستدعيه المدرب الجديد تاع المنتخب الوطني اللي رايحين نعرفوه شكون هو فالحلقات القليلة القادمة، وكاين أمينة وردة الجزائرية المغنية المشهورة اللي كانت تدير الحفلات في ليبيا لولاد القذافي، وكاين بيان سيغ سلمى فا اليكول اللي مشهورة في كتاب الفغونسي تاع السنة الرابعة، واللي يعرفوها كامل اللي قراو بهذا الكتاب.
قال مخلوف لازم ندير علاقة مع هذو لي ستار باش يديرولي الحملة، وهكا نضمن باش نربح، مالا اتصل بسلمى فا اليكول وجرا بيناتهم الحوار التالي:

مخلوف: يالو الو يالو الو الو، راكي تسمعي فيا ولا لالا؟
سلمى: وي جو تيكوت، تي كي توا؟

مخلوف: مخلوف ياو مخلوف البومباردي.
سلمى: او مخلوف مون شاغ بقاغ (بقار)، كومون تي فا؟ سافي لونتون، اون بليس جو فوا كو تا شونجي دو نيميغو، تحلبت وشغيت ابونمون؟

مخلوف: والله لوكان تعاونيني غير نولي نفورني عليك بالكارطة تاع 1200.
سلمى: هاهاها... كاسك ايليا مون شاغ؟

مخلوف:راني حاب نترشح لرئاسة كتاب القراءة ولازم تعاونوني، وكي نربح نشريلك لو ماغشي دو تا ماغ اللي يحل فالليل.
سلمى: اوكي مي ايلفو كو تي مو غودنغ ان ساغفيس ابخوبو اوماغ دو ليفغ دو لا ليكتيغ، بيزنس ايز بيزنس.

وهنا قالتلو سلمى بلي راهي حابة تقتل عمر اللي راهو يدور مع ماروكو، وماداهاش فيها... مخلوف البومباردي هل سيقبل الاتفاق؟ هذا ما سنعرفه في الحلقات القادمة.

الحلقة الثالثة والعشرون: الحقيقة الكاملة لاي دادا

نرجعو شوية لماروكو .. حيث تركناها مسكينة حايرة في الطلبات اللي طلبتها منها خربوشة والمتمثلة في
أولا: بيضة تاع حصان ابيض.
ثانيا: جناح تاع بول دوغ يماه سلوقية. ثالثا: ناب مسوس تاع قرلو.
رابعا: حليب تاع الجاجة.
خامسا: زعانف تاع حلوفة عوامة.
وكل هذو لازم يكون عندهم كونت تاع فيسبوك.

-->

رجعت ماروكو بنفسية سيئة للدار... قالت واش داني نروح لهذي الشوافة... واش داني ندير على تامي... والله لوكان جات عندها زعانف تامي لوكان نحيتهمولها الحلوفة العوامة في الزيقوات ونقصت حاجة على روحي، الستوتة والله مانزيد نهدر معاها...ياربي كيفاش ندير يا ربي كيفاش ندير... ماروكو شعلت التلفزيون قالت نفاجي على خاطري شوية، تقلب في القنوات لقات قناة من هذوك تاع مكافحة السحر والشعوذة، ماروكو قالت أنا خلات عليا نسيي مع هذو وخلاص، كومبوزات النيميرو ردوا عليها:

السلام عليكم أخي في الله، أو أختي في الله... إذا كنت ذكرا اضغط على واحد وإذا كنتي أنثى اضغطي على اثنين.
ماروكو ضغطت على اثنين.

اختي في الله إذا كنتي من بلاد المسلمين اضغطي على واحد اذا كنتي من بلاد الكفار اضغطي على اثنين.
ماروكو ضغطت على واحد.

اختي في الله إذا كنتي في دولة عربية اضغطي على واحد اذا كنتي في دولة غربية اضغطية على اثنين.
ماروكو لهنا بدا يطلعلها القاز قالت: كي شغل ماعندكمش افيشور تعرفو منين راني نعيط؟ ديجا الرقم تاع الدزاير وحدو.

لا تزعفي أختي في الله نحن فقط نتأكد... اذا كنت من بلاد المغرب الاسلامي اضغطي على... ماروكو هنا تقاطعو.
اسمع ياو أنا مالدزاير وبركا ما تعيي فيا... عيطتلك نحوس على حجاب ماشي باش تديرلي انتيروقاسيون...واش راني في كوميسارية؟ ايا اخدم خدمتك وماتعيينيش بزاف.
يا أختي في الله خلينا نبروفيتي من مالك الذي هو مال الله... اذا كنت من ولاية الجزائر اضغطي...

اسمع لوكان ما تدخلش فالمفيد ضرك... والله غير نسبك.
خلاص خلاص... واش خصك؟
خصني حجاب.
حجاب على واش؟
على خربوشة.
خربوشة؟ واش داك ليها؟ هذيك مشعوذة خطيرة!
دمروني على راسي... مالا علاش راني نعيطلك انت... باش تديرلي حل.
اوكي اوكي... شوفي يا بنتي...ضرك نبعثلك الجوقة تاعي... تضربي فيها جدبة خربوشة ماتزيدش تدور بيك.
جدبة؟ حبيتني نجدب؟
اجدبي اذا راكي حابة تسلكي... زوج قنانين، وستة قطوطة وراكي سلكتي؟
ناكل القنين معليش بصح القطوطة؟ واش حسبتني شينوية؟
لالا ماشي تاكليهم يا مخلوقة... تجدبي معاهم هوما الجوقة... ورددي الجملة التالية: اي دادا اي دادا اي دا اي دا دا دا... خربوشة ماتزيدش تدور بيك.
اسمع هذي الهدرة لازم نونطريني عليها مليح... ارسلهالي ميساج باش نحفظها مابيد ترسلي الجوقة.
اوكي يا بنتي.

وهكذا بعث شيخ الفضائية الجوقة الجدبية لماروكو... وكيما راكم تشوفو فالشاشة ماروكو ضربت فيها جدبة... هكا رانا كشفنالكم سر اي دا دا الخطير... لكن هل راح تنجح الطريقة؟ هذا ما سنعرفه في الحلقات القادمة...

الحلقة الثانية والعشرون: إلى غوانتانامو

بعدما عرفنا بلي الطايواني كشف العملية وزاد بيع صحابو، وسكوفيلد وعمر لما اكبشفوا بلي عمر بيعهم دارو رواحهم ما يعرفوهش... نجو لحلقة اليوم اللي رايحين نعرفو فيها الحوار اللي دار بين ازوط وسكوفيلد بعد الحادث الصادم.

ازوط: دارها بينا الحلوف وبيعنا، تفو على الرجلة.
سكوفيلد: اوه ماي فريند، ذو لاست ثينق كنت نتوقعو ايز طايواني يبيعنا، هي از نوت او مان تاع صح.

-->

ازوط: بهدل بينا الله يبهدل بيه، منا وهاك أنا نحشم نقول بلي أنا دزيري على جالو.
سكوفيلد: دونت وري ازوط، ان افري كونتري ذار ايز الرجال والهالف هالف(نص نص).
ازوط: واش براذر راك تصبر فيا؟ خليني في همي.

سكوفيلد: ناو ناو ازوط، اي تال ذو تروث، ذر ايز او لوت اوف ماشي رجال اين اميريكا، على كل حال ذر ايز نوت اور بروبلام، البروبلام أنو بطريق الصحراء فشلت، اند وي ويل نوت دو ذو بريزون برايك ان ذو ازوطايشن واي.
ازوط: ياعمارك خلات علينا، يتسمى واش؟ نبقاو هنا حياتنا كاملة؟

سكوفيلد: احمد ذو قاد(ربي) بلي قلنالهم وي دونت ناو ذس بياع اور ذاي بوت اس ويذ هيم اين غوانتانامو.
ازوط: تبا... غوانتانامو؟ منك صح؟

سكوفيلد: اوه يو ار ساو نية ماي فريند، ديجا ذاتس هابند مع اللي قبلهم، داوهم لغوانتامو... هذا هو جزاء البياعين.
ازوط: وأنت يا الخبيث علاش ماداوكش معاهم؟ واقيلا أنت جاسوس؟

سكوفيلد: ما تتقلقش شريكي، ذو ريزون واي ما داونيش، او ذو سايم ريزون اللي ماداوكش عليها انت اليوم.
ازوط: راك قاصد البياعة؟

سكوفيلد: اوف كورس... انا اي دو ذو ناوز (ندير النيف) مع المان تاع الصح، نوت مع البياعين.
ازوط: فهمتك فهمتك، يو ار رايت براذر، عندك الحق، الواحد ما يسكاريفيش بروحو على جال البياعين.

سكوفيلد: اوف كورس ماي فريند.
ازوط: المهم ضركا واش نديرو؟

سكوفيلد: ناو نفهمك.

ماذا سيقول سكوفيلد لعمر بعد فشل البريزون برايك على الطريقة الازوطية؟ وما هو مصير الطايواني؟ هذا ما سنعرفه في الحلقات القادمة.

الحلقة الواحدة والعشرون: الطايواني البياع

أهلا وسهلا أصدقائي، بعدما عرفنا فالحلقة اللي فاتت بلي حراس مركز الإيواء اكتشفو عملية الحفر اللي كان يقوم بها الطايواني، لأنو إنسان ماشي حريص وماخذاش بالتحذيرات تاع عمر ازوط اللي وصاه باش ما يديرش الحس، وهو للأسف كان يحفر ويغني حتى فاقولو، وعندما بداو يستجوبو فيه الطايواني كيما كامل عرفنا مات بالخوف، وباش يبعد التهمة على روحو بدا يقول هوما هوما، نجو لحلقة اليوم اللي رايحة تكشف المزيد من التفاصيل.

-->

الطايواني بعد ما حكماتو الخلعة، تلفولو الخيوطة كامل وبدا غير يخلط فالهدرة، كي زيروه وقالولو اعترف قالهم:
الطايواني: يا دياسي، موها اللي لاقوقي نرحفو رحفة ونرديو بزيرون بكاير لعى الرطيقة الاطوزية، ومساو العلمية طبريق الحصراء.
الحارس الأول: انت واقيلا راك تتمهبل سينيور، لوكان ما تهدرش معانا بالطاليانية تتزاقا عليك، فهمت؟
الحارس الثاني: ايه، راك معا دي زيطاليانو فيرو كيما قال الشيخ خوليو(يبداو الشرطة كمل يغنيو)
لاشاتمي كنتاري
كونا كيتا رايمانو
لاشاتمي كانتاري
ايتاليانو فيرو.
الطايواني: ياو لاشاتمي كنتاري مالخلعة جاتني لادياري... بالعقل يا سينيورات راكم جمدتولي الدم فالعرق.
الحارس الأول: ايا ازرب اعترف شكون هوما الشركاء تاوعك.
الطايواني: ارواحو معايا نوريهملكم.
وهنا الطايواني دا الحراس إلى الكوانة تاع الكليكة اللي كان راقد فيها عمر ازوط وسكوفيلد(بلا ما تفهمو النقص رحمة على والديكم) كي وصل عندهم حبس ووراهم بالصبع كيما راكم تشوفو فالصورة اللي التقطها مصور قناة ازوط تي في.
الطايواني: هذو هوما، عمر ازوط وسكوفيلد... سيرتو هذاك سكوفيلد الستوت حاسب روحو اكشن، هوما اللي دبرو عليا يا سينيورات أنا خاطيني.
الحارس الثاني: ازوط، سكوفيلد قيااااااااااااااام.
ازوط يتقلب فالفراش... بينما سكوفيلد يبقى يشخر كالعادة.
الحارس الأول: اواه... هذوما خصهم المطرق، قلتكم نووووووووووضو (يبدا الحارس يعيط عليهم).
وهنا سكوفيلد وازوط ينوضو مخلوعين.
ازوط: يا يما واش كاين؟
سكوفيلد: اوه واتس ذس؟ ذيس ايز نوت سيريوس، طايواني بيعنا ماي فريند!
ازوط: سكيمي خو، ما تحلبش.
الحارس الثاني: واش هي علاقتكم بهذا السينيور؟
هنا سكوفيلد وازوط شافو في بعضاهم وبصوت واحد يقولو:
ازوط وسكوفيلد: شكون؟
الطايواني هنا يبدا يبكي
الحارس الأول: راكم تتمهبلو؟هذا البنادم، الطايواني؟
الطايواني: راه عليا... واش درتو رواحكم ما تعرفونيش؟
سكوفيلد: هو ار يو؟ ستوب دصارة بليز.
ازوط: أنا ما نعرفش فواقر كيما هذو بعيد الشر.
الطايواني: يا يما حبو يباصوني ولاد الحرام.
سكوفيلد: قادر روحك بليز... اور اي ويل طططييييططط يو.
ازوط: لوكان نوض ليك نعاودلك لانسطالاسيون تاع فيقورتك يا واحد الطحان، احنا ولاد الحرام يا البياع؟
الحارس الثاني: بلعو كامل كيما راكم.
اهنا الطالياني يزيد فالبكا ويولي ينوح واع واع اافافافافافاافا وييغ ويييغ... الخ من البكاء الماداماتي.
الحارس الأول: (يكلم صاحبو) قلتلك سينيور هذا الطايواني مجرم خطير، ساعات تبانلو عقلية يحط راسو فالراية نورمال، هذو السينيورات باين عليهم ولاد فاميلية(يحكي على سكوفيلد وعمر ازوط اللي كانو هنا مكمشين كالبيبيات البراءة اللي حبة بيض ما يقلوهاش باسكو تغيظهم كي يكسروها) ايا ديرلو ليمينوت.
الطايواني: انا بريييييء برييييييئ بريييييييييييييييييئ.
ازوط: طريق السد يا البياع.
سكوفيلد: قاو تو هل(اذهب الى الجحيم اون اونقلي ههه).
وهكذا اخذ الطالياني الى وجهة مجهولة بينما بقاو سكوفيلد وعمر مخلوعين في واش صرا... تحبو تعرفو وين داو الطايواني؟ واش هو الحديث اللي دار بين ازوط وسكوفيلد؟ واش هو مصير عملية بطريق الصحراء؟ تابعو الحلقات القادمة

الحلقة العشرون: الفشلاسيون

نعود الآن بعد طول غياب الى عمر ازوط ورضا الطايواني وسكوفيلد، اللي تفاهمو باش ينفذو اونسومبل عملية البريزون برايك على الطريقة الازوطية وذلك بحفر نفق تحت مركز الايواء.
في ليلة من الليالي... بينما كان الطايواني راقد جا ليه ازوط ينوض فيه غير بالشوية
ازوط: ياو، طايواني، رضا نوض، نوض بركانا مالجياحة.
الطايواني: خليني نرقد يا عمر علاش هكا.
ازوط: نوض راني نقلك جا التور تاعك تاع الحفير.
الطايواني: علاش شحال راهي الساعة؟

-->

ازوط: راهي الزوج.
الطايواني: ديجا الزوج؟ أواه واقيلا راك تلعب فالساعة أنت.
هنا عمر تقلق راح جاب بيدون ما تاع تسياق ورماه على الطايواني.
ازوط: جداك ماشي راني نلعب فالساعة.
الطايواني: اوووووووووووووووووه، واش بيك ياخو كنت نقصر معاك.
ازوط: نوض ماشي وقاتك انت ثاني، ديجا راك قلقت الناس اللي راهم راقدين هنا، ماراكش تشوف في سكوفيلد كيفاش راه يشخر؟
الطايواني: بابابابابابا، تقول عليه تراكتور تاع طرطور والفلاح العجوز، هذا ماعندوش فم، عندو مجيرية.
ازوط: نوض وبركا مالهدرة الزايدة تاعك، خلينا نرقدو، ورد بالك كاش ما يشوفك كاش عساس.
وهنا الطايواني ناض من بلاصتو وبدا يحفر بالباطة تاع الطون، ولأنو حابس ويتصنتش بدا يغني

ساعات تبانلي عقلية

ندير بريزون برايك ازوطية

نحفر بالباطة تاع الطون، حتى ينثقبو يديا

ندير فيها حفرة تجيبني برة مع المافيا

الحارس الأول: واش راك دير يا سنيور؟
هنا يلتفت الطايواني ليجد الحراس تاع المركز مداورين بيه وقد اكتشفو عملية الحفر اللي راه يدير فيها، الطايواني طبعا تخلع كي شافهم
الطايواني: ياعمي عمي، انا والله غير خاطيني.
الحارس الأول: واشنو هذا يا سنيور؟ فرشيطة؟ موس؟ كوب اونقل؟ وري واش كاين في يدك... باطة تاع طون!
الطايواني: يا عمي عمي، أنا خاطيني... هوما اللي عمرولي راسي.
الحارس الثاني: شكون هاذو اللي عمرولك راسك يا سينيور؟ وواش هذي الحفرة اللي راك تحفر فيها؟
الطايواني: هوما والله غير هوما، هوما اللي دبرو عليا.
الحارس الأول: شكون هذوما؟ وواش قاللولك؟ انطق.
الطايواني: هوما يا سيادي، قالولي نحفرو حفرة ونهربو مالحبس.
الحارس الثاني: هههههههههه عند بالكم الحالة ساهلة؟ ياو الكاميرات رانا مركبينهم باطل واقيلا؟ ايا ازرب اعترف سينيور اذا راك حاب تنقص العقوبة على روحك.
وهنا بدا الطايواني يحكي... ياترى هل رايح يبيع صحابو؟ هذا ما سنعرفه فالحلقة القادمة

الحلقة التاسعة عشرة: موجز الأنباء

طرا طا طا طراااااااااااااا موجز الأنباء من قناة ازوط تي في وهذا في بث مشترك مع قناة الجزيرة يقدمه لكم موح القراعجي:

أهلا بكم أعزائي المشاهدين

بلغنا أن أمينة وردة الجزائرية قد تحصلت على إفراج مؤقت بيان سيغ حيث تستعد لاجتياز امتحان البكالوريا غدا... نتمنى لكل المترشحين النجاح بيان سيغ وان شاء الله ما تجيبيهش أنتي يا امينة.

على صعيد آخر بلغنا إستدعاء المدرب الجديد بيان سيغ للمنتخب الوطني لنبيل الكابتن ماجد لتدعيم الخط الهجومي المسكين للخضرة، الذي مرمده بن شيخة اللي رجعو غيرتس بيان سيغ شخشوخة.

وكل هذه الافراجات هي مؤقتة بيان سيغ حتى يكتمل التحقيق.

على صعيد آخر بلغنا أن ماروكو تخاسرت مع تامي بيان سيغ بعدما اكتشفت بلي تامي كانت حابة
تدير بينها وبين عمر برك باسكو هي بايرة، وواحد ما شاف فيها.بيان سيغ

خبر آخر يستعد طرطور لافتتاح شركة استيراد وتصدير للفول واختار لها اسم فول-زفاكن.

لابرانتي يواصل تحقيقاته بيان سيغ ويكشف عن تورط شخصية سياسية كبيرة في تدبير حادثة ازوط وسيعلن عنها قريبا

البقرة اللي تحلبها نورة أصيبت بجنون البقر، وصكت نورة صكة جابتها كاو بيان سيغ ، وكي داوها للسبيطار صابو الطبة مقرفين، ولولا تدخل كونان بيان سيغ لوكان ما لقاتش اللي يسلكها

88888888888888888888888888888888888888

-->

سلماء السلفية سلمى فا اليكول سابقا تنظم إلى تنظيم الواقفة في بلاد المغرب الاسلامي برتبة مفتية الجماعة ، وربي يستر بيان سيغ من فتاوي هذي المخلوقة

تم القاء القبض على خربوشة بتهمة نشر الدجل والشعوذة في المجتمع الجزائري المحافظ بيان سيغ

وفي الأخبار الدولية تستمر عملية الحفر اللي يجريها بيان سيغ رضا الطايواني وعمر ازوط وسكوفيلد في سرية تامة

هذه هي العناوين ترقبوا التفاصيل في حلقاتنا القادمة وهي الحلقات الأخيرة هذا الموسم

الحلقة الثامنة عشرة: سلماء السلفية

بعدما عرفنا في الحلقة الماضية بلي خربوشة المشعوذة طلبت طلبات غريبة من ماروكو باش تحيبلها الرسمي على عمر ازوط، وهذي الطلبات تتمثل في أولا: بيضة تاع حصان ابيض.
ثانيا: جناح تاع بول دوغ يماه سلوقية.
ثالثا: ناب مسوس تاع قرلو.
رابعا: حليب تاع الجاجة.
خامسا: زعانف تاع حلوفة عوامة، ولازم كامل هذو يكون عندهم كونت فالفيسبوك، نجو لحلقة اليوم اللي رايحين فيها نولو شوية لاجواء سركاجي وعائلة فا اليكول اللي ما سمعنا عليهم حتى خبر ملي دارت سلمى تونتاتيف دو سويسيد، وطبعا في مثل هذه الحالات لازم نربطو الإتصال بمراسلنا موح القراعجي.
لادمين: موح مساء الخير هل أنت في الإستماع؟

-->

موح: بيان سيغ أنا في الاستماع، صباح الخير عليك، وبيان سيغ على المشاهدين.
لادمين: خويا موح، أنت دائما في مقر الحدث، هل ممكن تطلعنا على آخر المستجدات؟
موح: بيان سيغ، وموغ دو غيغ، أولا أفاكسي لك هذا الخبر الخطير، علمت أن سلمى فا اليكول تمكنت من المستشفى بريك، حيث هربت في حطة تاع فرملية من السبيطار اللي نقلوها ليه لما حاولت الانتحار بمبيد الحلابين، وراحت إلى وجهة مجهولة بيان سيغ، ولحد الساعة ماراناش عارفين وين هربت، لكن هناك إشاعات قوية عن أن السعودية مستعدة لاستقبالها في جدة بيان سيغ.
لادمين: سمحلي نقاطعك خويا بيان سيغ، نربط الاتصال حالا بقناة ازوط تي في، حيث وصل تسجيل مرئي نشوفوه.
لما يشغل التسجيل يتفاجئ الكل بيان سيغ بوحدة لابسة النقاب، وتتحدث بعربية فصيحة وتقول الخطاب التالي:
المنقبة: السلام عليكم، أنا الأخت سلمى فا اليكول سابقا، أعلن رسميا تغيير اسمي إلى سلماء السلفية، وإرتدائي للنقاب الشرعي، وسأقيم هنا في السعودية بين اخوتي في انتظار أن يفتح الله علي بالزوج الصالح، كما اعتذر على ما كنت عليه من ضلالة ، وخاصة فيما يتعلق بعمر ازوط الزنديق ، وحديثي بالفغونسي، وانسلاخي عن هموم أمتي الإسلامية، وأدعو أخي وأختي نسيم ايمنام وأمينة الشونتوز إلى التوبة واعتزال الفن، وإلا فإن الجهاد سيحق عليكم، وسأكون أنا من سيقطف رؤوسكم تنفيذا لحدود الله.
اللهم اغفر لعبدتك الضعيفة سلماء، اللهم ارحمني واهدي عائلتي أمين أمين أمين!
وهنا ينتهي الخطاب، ينقطع الارسال وتبث صور لمدن من الجزائر مع كتابة نعتذر على هذا الخلل التقني سنعود لاحقا.
طبعا ولا واحد كان يتوقع أنو سلمى فا اليكول ممكن تولي سلفية، وعندها ميول ارهابية، لكن هذا هو الشي اللي وقع، وراح نكتشفو في الحلقات القادمة العديد من الأشياء الصادمة

الحلقة السابعة عشرة: شوافة اوت كلاس

بعدما عرفنا في الحلقة الماضية بلي تامي دات ماروكو عند خربوشة المخنانة الماجور دو برومو تاع لالة زوينة (بيونة) اللي فتلت الطعام باليد تاع الميت، باش تفريلها لافار تاع عمر، وبعدما حبسنا في الوقت اللي كانت فيه خربوشة تحوس فالايفون تاعها باستعمال برنامج جوجل ارث اديسيون شوافات، نجو لحلقة اليوم اللي فيها نعرفو المزيد من الأحداث.

خربوشة بدات تحوس على عمر ازوط، وماروكو وتامي يتغامزو ما راهم فاهمين في يمات يماها والو... بعد قليل خربوشة تبتسم.(نذكروكم بلي خربوشة ما تعرفش تنطق الراء وتقول في بلاصتها نون)
خربوشة:

-->

اظهن وبان يا ازوط الحناق
يا غصن البان حبيبك مشتاق
وين راك متخبي بنكا من النفاق
لوكان ما تظهنش ننجعك لقلاق
بوووووووووواع... ناني لقيتو ناني لقيتو.
ماروكو: قوليلي وين راه يا لالا يرحم والديك.
خربوشة: راه في ليطنانجي، بصح وين مانقدنش نعنف ايكزاكت، باسكو ناه في بلاصة فيها الدزينيين والطلاين وليزاميغيكان.
ماروكو: ياو راه فالطاليان هو بعثلي ميساج يا لالة خربوشة.
خربوشة: انتي تونيلي شغلي؟ بلعي فمك ولا نرجعك جنانة تقاقي صباح وعشية.
تامي: ياربي ياربي اش داني نجيبها هذي؟ راهي حابة تباصينا؟
خربوشة: شوفي باش نفنيلك لافان، على بالك واش لازم تجيبيلي، هذي مسألة صعيبة، ولسياد يدمونديو واحنا علينا التنفيذ، السمع والطاعة بووووووووواع.
ماروكو: قولي للسياد ماروكو مسكينة، اسكو نقدر نخلص بالفاسيليتي؟
خربوشة: أنت واقيلا ناكي تتمسخني بيا؟ فاسيليتي؟ علاش ناكي نايحة تشني فنيجيدان؟ اسمعي تنفذي ولا...
تامي: تنفذ بسيف عليها، لسياد ما يلعبوش.
ماروكو: قوليلي واش هو المطلوب مني ونقولك اذا نقدرلالا خربوشة.
خربوشة هنا تحك يديها فرحانة كاللي رايح يدير صفقة تاع عمرو.
خربوشة: شوفي أنا راهو وصلني ايميل من لسياد فيه قائمة الطلبات مانكي عندك.
أولا: بيضة تاع حصان ابيض.
ثانيا: جناح تاع بول دوغ يماه سلوقية.
ثالثا: ناب مسوس تاع قرلو.
رابعا: حليب تاع الجاجة.
خامسا: زعانف تاع حلوفة عوامة.
ماروكو: يا يما يا يما باصيت، منين نجيبلك هذو كامل؟
خربوشة: تجيبلي ليا؟ ياو لسياد هوما اللي يدومونديو ماشي حنا فهمتي ولا لالا؟ زيد بالزيادة الحصان والبول دوغ والسلوقية والقرلو والجاجة والحلوفة كامل لازم يكون عندهم كونت فالفيسبوك... قوليلهم يبعثولي ديزانفيتاسيون باش نقرعج عليهم، وما تنسايش تقوليلهم يدخلو فالباج فان تاعي اوكي؟ الي باي باي.
وهنا شعلت خربوشة المخنانة الفروطوار السحري تاعها وقلعت بيه تاركة ماروكو وتامي في حيرة شديدة من الطلبات الكثيرة اللي تعجز، أحداث كثيرة مشوقة جدا في الحلقات القليلة القادمة حينما نعرف مصير خربوشة ولانسبكتور وعائلة فا اليكول و عمر ازوط بيان سيغ.

الحلقة السادسة عشر : خربوشة تلميذة زوينة.

بعدما عرفنا بلي تامي صحبت ماروكو جات ليها للدار وقاعدة توسوسلها بلي عمر دار لافار مع القاورية، وقالتلها بلي لازم تروح معاها للحمام يشوفو واحد الطيابة اللي رايحة تحللها هذا المشكل، نوصلو لهذي الحلقة اللي رايحة تصدمنا كامل وتخلينا نعرفو واش راهو يصرا في كواليس الحمامات حيث تنتشر
الطيابات بشدة.

ماروكو وتامي راحو للحمام تاع الحومة الدوزيام اللي وسمو حمام "اتنقى واترقى" واللي جامي ما دخلاتو ماروكو ، دخلو وحكمو بلاصة، استناو حتى تجي الطيابة وأثناء الانتظار دار هذا الحوار:

ماروكو: اسمعي هذا الحمام راه يبانلي بيزار، راكي سير من هذي البلاصة.
تامي: اسكتي علينا يا الجايحة، جبتك تديري لافار وتحوسي تبهدليني؟
ماروكو: لالا ماشي... كي شغل... جو سون كوم سي... جاغيف با... راني حاسة بلي...
تامي: اسمعي... أنا درت فيك مزية جبتك هنا وانتي راكي تتشنفي؟ ديري مليح في بالك بلي خربوشة ما تحبش التمسخير.
ماروكو: محشوشة؟ يا يما شكون هذي محشوشة؟
تامي: ياو خربوشة ماشي محشوشة يحشو راسك نشالله انتي و ازوط تاعك... هذي خربوشة الميور تاع الميورات، الفور تاع الفورات، نمبر وان في تجييح الرجال اللي يديرو القرون، ويحبو يلعبو بكعايلهم، شعارها البيت الشعري المأثور:

-->

اذا الرجل يوما أراد الخيانة
فلا حاجة لأن تحسي بالسخانة
جيبيلي تصويرتو يا مولات الخانة
وانا نرجعو كي الجاجة المشيانة

ماروكو: يا مامي يا مامي، اسمعي انا نخاف مالشوفات ربي يسترك ايا نروحو.
تامي: شواااااااافة؟ انتي حابة تجيبلينا البلا؟ مسلمين مكتفين مسلمين مكتفين... سامحوها يا سيادنا راهي جاهلة وما تعرفش السيستام.
ماروكو: انا السيستام اللي راني عارفاتو ضرك هو السيستام دالارم وضرك نشعلو لوكان ما تخرجينيش منا والله نتوغ ونعيط ونسمع الغاشي.
خربوشة: واش تسمعي يا لالة؟

وهنا تدخل خربوشة مزمجرة كالأسد تطير على فروطوار سحري، واضعة كاسكيطة على رأسها ونظارات جورجيو أرماني على عيونها الحمراء، وبعد أن سطاسيونات الفروطوار نحات لي لينات دو سول تاعها وضربت ماروكو بخزرة خلاتها تنقص خمسة كيلو فالميزان، طبعا راكم عارفين بلي ماروكو كانت تشطح بلا محارم مالخوف، في الوقت اللي كانت تامي تفتف في صدرها وتقول مسلمين مكتفين يا سيادي العارفين.

خربوشة مدت صبعها لماروكو وقالتلها كلام عرفت من خلالو بلي خربوشة مخنانة وعندها مشكل في نطق حرف الراء:

خربوشة: أنتي اللي ناكي حابة تشعلي السيستام دالانم، ياو ناكي غالطة بوووووواع... أنا خنبوشة واللي يغلط معايا ندينو فنيت اوملات بالفنوماج، واللي ما ناهوش عانف أنا عندمن قنيت... ينوح يسقسي خالتي زوينة اللي فتلت الطعام بالي تاع الميت وقتاش دنت عندها سطاج بناتيك بووووووواع.
تامي: لالة خربوشة ربي يسترك هذي راهي بوهالية وحابسة، وماتعرفكش اسمحليها وديري مزية.
ماروكو: ايه يا لالة طربوشة اسمحيلي.
تامي ضربت ماروكو بالكف على رقبتها وقالتها
تامي: من قبيلات محشوشة وضرك طربوشة انتي راكي حابة تطيبنا بربوشة ولا كيفاش؟
خربوشة: خين ما شقاك يا ماروكو؟
ماروكو: وتعرفي اسمي ثانيت اواااااااااااااااااه هذي امبوسيبل!
خربوشة: ناكي تتمسخني بيا؟ انا ناني عانفة بلي جيتي على جال عمن ازوط... احكي وندي بالك تكذبي عليا، والا ناكي عانفة واش نقدن نعمل لك ايا ازنبي بووووووووووواع.
تامي: بلا ما تتقلقي لالة خربوشة ضرك نحكولك كلشي.
تامي بدات تحكي في بلاصت ماروكو اللي كانت تبكي كعجايز الدوار... وبعدما صنعت مالحبة قبة وعظمت كلشي ورجعت ازوط خاين عشرة وغدار وعشاق قاوريات وهراب ولصقت فيه كامل الطبايع الشينين كي كملت هدرتها خربوشة جبدت الايفون تاعها ودارت جوجل ارث اديسيون شوافات وبدات تحوس على عمر ازوط.

ماذا اكتشفت؟ ماذا قررت؟ وواش هي الشروط تاعها؟ علاش تامي راهي تحوس تدخل بين ماروكو وعمر؟ هذا ما سنعرفه في الحلقات القادمة

الحلقة الخامسة عشرة: سوق النسا وحكايات طيابات الحمام

بعدما عرفنا في الحلقة الماضية بلي سلمى فا اليكول حاولت الإنتحار بمبيد الحلابين السام ونقلت للمستشفى في حالة خطيرة، وعرفنا بلي التحقيقات اللي كلف بيها لانسبكتور لابرانتي باش يكثف منها في كتاب القراءة توصلت إلى التأكد بأن القاتل اللي استأجروه عائلة فا اليكول هو من خارج كتاب القراءة.

نجو لحلقة اليوم اللي رايحة تكشفنا الحالة تاع ماروكو ملي وصلتها رسالة عمر اللي قالها فيها بلي حرق منذ فترة طويلة نسبيا، وهي حالة يمكن أن نختصرها في الله لا يشوفكم، حيث أن ماروكو المسكينة ماولات لا تاكل لا تشرب، وشيانت ولات كي عرف الزيتون، ودخلت في حالة من الديبريسيون اللي خلاتها تبقى في الدار وما تخرجش، وما تردش فالبورطابل كامل، مالا صاحبتها تامي (هذيك اللي تدير نواضر وتدور معاها فالديسان أنيمي اللي تعرفوها كامل) تقلقت عليها وجات ليها للدار، وقالتلها: 

-->

ماروكو واش بيك يا طفلة؟ هذا كامل على جال عمر تاع كتاب القراءة؟ كاين كتاب القراءة تاع الإصلاحات معمر بالبابيش، ربي يهديك.
لالا ياختي تامي، راكي تعرفيني عمر ازوط، ببراد بيت ومانبدلوش، ياو هو حبي لول وحبي لاخر داني داني داااااااااااان، اه اه اه وااااااااااااع(وبدات تبكي).
انت جايحة وماتعرفيش صلاحك، لوكان جا يحبك صح ما يحرقش ويخليك.
ومن بعد؟ راح باش يدير التاويل ويرجع يزوج بيا.
ههههه يزوج بيك... هههه النية والسعادة، انت مهبولة واقيلا؟ ياو دارت بيه القاورية سي بون... اذا مازالو شافي بلي هو دزيري راكي مليحة.
دارت بيه القاورية؟ اسمعي بركاينا مالهبال تاعك انت هذا واش خصني... كي شغل عاجباتك حالتي وراكي تزيدي عليا اه اه اه واااااااااااع(تبكي من جديد)
يا ماروكو ياشريكتي ما تكونيش جايحة، امسحي دموعك وانساي هذا عمر، ولا نقلك... عندي واحد الفكرة هايلة تجيبو حي مكتف مطرف يلقف كالجيفة.
جيبيه بصح حي ماشي جيفة، واش هي الفكرة ازربي قوليلي.
نروحو للحمام ونحكيلك تماك.
هذا وقت حمام انت تاني؟
ياو جيستومون الطيابة هي اللي راهي رايحة تريقلك يا الحابسة.
اه والله انا صح حابسة ودايما نتقلق، اصبري نوجد كابتي ونروحو.

وهكذا وجدت ماروكو كابتها، وراحت مع تامي ميتة بالسعادة كيما راكم تشوفو فالصورة اللي سحبتها للحمام تاع الحومة حيث الطيابة التي من المفروض انو رايحة تحللها مشكلة عمر ازوط الحارق في ايطاليا، وللأسف الصحابات بارفوا يحبو يصبرو صحاباتهم فيتهمو الرجال بالباطل، لكن مالذي سيحدث في الحمام؟ هذا ما سنعرفه في الحلقة القادمة

الحلقة الرابعة عشرة: انتحار بمبيد الحلابين

في الحلقات القليلة الماضية خلينا عائلة فا اليكول فالحبس ومازدناش حكينا عليهم ملي حرق عمر ازوط للطاليان... والتحقيقات اللي عرفنا بلي مازالت متواصلة من هذاك الوقت، خاصة وأن مساعي القذافي التهديدية من أجل إطلاق سراح عائلة فا اليكول باءت بالفشل ملي جات نادين بكبسولة الزمن وداتو لعام 1000 قبل الميلاد.. نرجعو لسركاجي مع مراسلنا السري من هناك موح القراعجي ... نربط الاتصال حالا ألو الو... نعتذر على هذا... أواه ألو ألو نعم وأخيرا موح موح أنت تسمعني؟
نعم خويا لادمين بيان سيغ راني معاك.
هل ممكن تحطنا في أجواء سركاجي؟
بيان سيغ دائما مع القرع الحصرية لقناة ازوط الدولية،بيان سيغ يمكننا القول أن الخبر المؤكد هو أنو نسيم ايمينام كتب غنية على الحبس بيان سيغ يقول فيها

جو سوي نسيم ايمنام جو بوغ با دو بخيزون
جو فو بخوف كو جو سوي كالم وجوبو غيزيستي دي زون
 

-->

أما نبيل الكابتن ماجد وامينة وردة الجزائرية فبيان سيغ راهم في حالة ديبخيسيون شديدة، والاخطر بيان سيغ هو محاولة سلمى فا اليكول الانتحار باستعمال مبيد الحلابين السام بيان سيغ اللي يتباع حصريا في سوق الفلاح، وعليه توجب نقلها إلى المستشفى على جناح السرعة والاستعجال بيان سيغ، ومازالنا ننتظر أخبار من السبيطار، على صعيد آخر في مهمة آخرى تخص البحث عن القاتل في كتاب القراءة بيان سيغ كلف بيها لانسبكتور الطاهر لابرانتي... وصلتنا أخبار أن القاتل على حساب الشوفة ظهر بأنه خاطي كتاب القراءة...
لكن هل عرفتو "بيان سيغ" هوية القاتل اللي استأجروه؟
نعم خويا لادمين عندنا بيان سيغ معلومات لكن مارانش متأكدين منها ولهذا نفضلوا نحتفضو بيها لرواحنا لكني سأقرعج لك بيان سيغ بعد نهاية المكالمة
شكرا لك موح القراعجي... كنت معنا من سركاجي
وهكا خاوتي ننتظرو قرعة جديدة من عند خونا موح فيها أخبار جديدة

الحلقة الثالثة عشر:الطريقة الإزوطية في البريزون برايك

بعدما اكتشفنا بلي سكوفيلد قرر يتعاون مع عمر ازوط ورضا الطايواني من أجل تنفيذ عملية "بطريق الصحراء" والتي تنص على إنجاز بريزون برايك على الطريقة الازوطية (اللي ما يعرفش واش معنتها الطريقة الازوطية هي ببساطة طريقة رائدة في مجال الترقيع البتروكيميائي للهروب الاستقراطي من الهيمنة الاستعجالية للفرونوكوسيزم الراديكالي المتغلب على الاشتراكية المترسملة في الدول المحروق اليها) نلحقو للحلقة اللي يشرح فيها سكوفيلد مراحل عملية بطريق الصحراء لعمر والطايواني.
بعدما وافق عمر على الدخول في العملية مع سكوفيلد، بشرط أنو يفهمها مليح ويعطيلو وقت يفكر بدا سكوفيلد يشرح العملية وعمر يترجم للطايواني اللي سبق وقلنالكم بلي ما يعرف يحكي حتى لغة من غير الدارجة الجزائرية، وهذي هي الترجمة الحرفية لواش قال سكوفيلد على لسان عمر ازوط:" نستناو كي يجيبولنا العشاء، نخبو المغارف، نخبو الفراشط، نخبو لمواس، ونحبو البايط تاع الطون وكل حاجة ميتاليك، فالليل كي تتكالما الحالة وتنقص الحراسة نبداو نحفرو في لرض حتى نديرو نفق خارج المركز وكاين صحابي مالمافيا راهم يحفرو من برة رايحين نتلاقاو بيهم وبعد ما نخرجو سون زوكان بخوبلام يريقلونا"

-->
الطايواني: نحفرو بلمواس والفراشط؟ هذا واقيلا مهبول!!!
سكوفليد: ناو ناو تايواني، أم سيريوس انا بديت ذو وورك عندي بزاف، راني قريب نفينشيه، اي نيد كو دمان اونلي هذا ماكان.
ازوط: أو كنت تحفر ديجا؟ وريلنا نشوفو.
سكوفيلد: اه يو وانا دو تو مي شالا بالا؟ اتيز نوت سيريوس ماي فرايندز!
الطايواني: واش خويا وليت تغني الراي؟ شالا بالا ومانيش عارف واش... يكون في معلومك أنا مطرب السجن الأول ما نحب حتى واحد يديلي بلاصتي، فهمت ول؟
ازوط: (للطالياني) بلع علينا شوية هذا وقتك انت... شوف شريكي(لسكوفيلد) يا توريلنا الخدمة تاعك يا اتيز نوت اوكي، بالاك يو ار تتقعد بينا؟ وين نعرف انا؟
سكوفيلد: اوكي اوكي دونت وري... تبعوني كارفولي.
وهكذا مشى الطايواني وازوط وسكوفيلد للكوانة اللي راهو يحفر فيها سكوفيلد واكتشفوا نفق طويل حفرو ديجا... تخلعو مساكن كي شافوه
الطايواني: با با با با با يااااااااااااااااااااااااااااااه انت صح اكشن ياه راك تلفتهالي خو...
ازوط: تحب الصراحة خويا سكوفيلد... يو ار سوبر فوووور انا نتحيلك.
سكوفيلد: هاهاهاها اند ناو يو بليف مي؟
ازوط: معلوم نبليفيو بيك راك خشين خو.
الطايواني: بصح أنا الحاجة اللي ما فهمتهاش علاش سميت العملية بطريق الصحراء؟
(ازوط هنا تخلع من سؤال الطايواني المهم خاصة وأنو أسئلتو فالعادة مايد ان تايوان)
سكوفيلد: بي كوز أنا وليد السناو(الثلج) أيام بطريق... أند يو ار ولاد ذو ديرزت(الصحراء) يو ار أفناك ما تشفاوش لاكوب دي موند؟ مالا هكا باش نبينو بلي تعاونا ودرنا العملية.
ازوط والطايواني: وان تو ثري فيفا لالجيري.
سكوفيلد: ايفري داي فيفا يو اس اي.
وهكذا حطو الخاوة يديهم في يدين بعض وقررو باش يبداو الحفر ويديرو البريزون بريك على الطريقة الازوطية في القريب العاجل... هل رايحين ينجحوا؟ هل ما يفيقولهمش الحراس؟ هذا ما سنعرفه في الحلقات القادمة... ومن الآن نقلكم بلي الحلقة الجاية رايحة ترجع توضح بعض الأمور اللي ماراهيش واضحة... انتظروها
لقراءة الحلقة رباطاش
http://omarizwit.blogspot.com/2013/04/blog-post_5686.html 
أو كل الحلقات من هنا
http://omarizwit.blogspot.com/2013/04/blog-post_3655.html
 

الحلقة الثانية عشرة: سكوفيلد وعملية بطريق الصحراء

بعدما عرفنا في الحلقة الماضية بلي رضا الطالياني وعمر ازوط راهم محبوسين في مركز الإيواء بسردينيا بتهمة الهجرة غير الشرعية، نوصلو لحلقة اليوم اللي رايحة تشهد دخول صخشية مهمة جدا في عالم الهروب من لحباس، أكبر شخص فحات من السجون، صاحب جائزة الهربة الكاملة من حبس غلوب، وأوسكار أحسن هراب، سكوفيلد اون بارسون.

سكوفيلد اللي حرق مالماريكان باش يلتحق بالمافيا الإيطالية، ويحقق احلامو الإجرامية، كان دار خطة باش يهرب مالحبس بصح هذي الخطة تحتاج زوج يعاونوه، والناس اللي شافهم فالمركز بانتلو بلي ماعندهمش الكوراج اللازم باش ينفذو العملية اللي أطلق عليها اسم "بطريق الصحراء"، إلى غاية الوقت اللي شاف فيه عمر ازوط ورضا الطايواني اللي لاعبها طالياني، وشاف فيهم تلك العقلية الخارقة والتي يصطلح على تسميتها بالعقلية دي زاد، المتميزة بالزديم والدمير والعفيس والمارش اريار الكاسي، واللغة الطاليانية المال كونيجقي مال بلاسي، حيث قرر باش تتحد القوات المحابسية الأمريكية مع قوات الحرقة الجزائرية، لتنفيذ عملية البريزون بريك على الطريقة الازوطية.
بعد ما تسرسب سكوفيلد وقعد قدام عمر ازوط ورضا الطايواني دار الحوار التالي:

-->

سكوفيلد: قود مورنينق عليكم ماي فريندز، واش راكم لاباس؟
ازوط: واش من لاباس راك تتقعد خو؟
سكوفيلد: ناو ناو أم نوت تقعيدايشن، أي وانا هروبايشن ويث يو فريندز
الطايواني: هروبايشن؟ اسمع ياو... بركانا مالتحراش... جو فو با دير تحراشيشن هكا باش تفهمني قوود.
سكوفيلد: ناو ناو وحق رب الكعبة، ام سيريوس ديرو عليا ماي فريندز.
(عمر هنا خالا رضا في وذنو وقالو هذا ماريكاني محلب، نتبعوه ونشوفو بالاك يكون فايق كي تاع ليفيلم اكشن تاعهم ويهربنا)
ازوط: واش ماي فريند، هاف يو خطة؟
سكوفيلد: ياس اوف كورس... كام ان نفهمكم واش نديرو ماي فريندز.
وهنا سكوفيلد بدا يشرح لعمر اللي يطرطق اونقلي واللي كان يتكفل بالترجمة للطايواني اللي ما يعرف لا طاليانية لا طايوانية، شرحلهم بالتفصيل عملية بطريق الصحراء وقالهم على الأدوات اللي لازم يستعملوهم... واش هي هذي الخطة؟ هذا ما سنعرفه في الحلقات القادمة.
آه نسيت بزاف راهم حابين يعرفو واش صرا لعايلة فا اليكول... ههههههه غدوة نقولكم... ستاي تيون فور اول ثي انفورمايشن اند قود ايفنينق(بت مع سكوفيلد صبحت نقاقي).

اللي مافهمش الحوار الترجمة ستكون حاضرة قريبا على قناة ازوط تي في

الحلقة الحادية عشرة: الطالياني الطايواني

بعدما عرفنا بلي عمر تاع كتاب القراءة كان لاعبها ميت واضطر يحرق من لالجيري باش ما تزوجوش أمي في السوق ببنت ختها سندريلا، وأبي في البستان ببنت خوه فلة، وعرفنا بلي عمر راه على مشارف الحدود الطاليانية، نوصلو لحقلة اليوم اللي رايحة تكشف وصول عمر تاع كتاب القراءة لسردينيا.
بعد ما تمرمد فالبحر بالجوع وبعد ما خلاصلو ليسونس وغرقت بيه الفلوكة وصاب روحو اوبليجي يكملها عومان، شاف عمر كي شغل بابور جاي من جهتو عمر ولا يعيط، ياو ازووووووط ياو سلكوني... جا البابور من جيهتو واتضح أنو حرس السواحل الإيطالية هوما اللي كانو جايين باش يلقيو القبض عليه بتهمة الهجرة غير الشرعية...عمر قال المهم
كي سلكت ويدوني وين يدوني خير مالموت.

-->

ماعليناش بعد ما القاو القبض عليه وداوه لمركز الإيواء فالظلمة والليل يسمع في واحد يغني جوزيفين جوزيفين مادرتي فيا اعطيني كواغطي ونكوتي ونروح لدارنا ويا... قال أنا هذا الصوت نعرفو مليح، بصح هذا يقول نروح لدارنا وهو جاي حارق، راح من جهة الصوت يشوف شكون...

ياااااااااااااا رضا الطالياني... واش راك تدير هنا يا المهبول؟
يااااااا خويا عمر توحشتك بزااااااااااااااف.
(بعد ما تعانقو وشموا ريحة لبلاد في بعضاهم رجعو للهدرة)
ياخي انت طالياني نورمالمون تدخل للطاليان نورمال علاش حرقت؟
ياو أنا طالياني طايواني... زعمة بغيت نحشيهالهم كي سميت روحي طالياني بصح ما قدرتش لقيت روحي لازم نحرق باش نشوف جوزيفين باسكو توحشتها بزاف، وانت واش حوالك مع ماروكو؟
ايه واش نقلك يا خو... انا ثاني هربت على جال دارنا اللي حبو يزوجوني بالسيف.... المهم قلي واش مازالت تغني على جوزيفين؟ خلينا منها... راني كتبت غنية فالفلوكة اللي حرقت فيها فور بزاف ياخو.
ايا جيب خويا جيب... خلينا نديرو السوكسي الجديد.

وهنا عمر تاع كتاب القراءة عطا للطالياني الغنية تاع يا البابور يا مون امور خرجني من لاميزير في بلادي راني محقور عييت عييت وجوني مار... اللي ولات سوكسي كبير من بعد كيما راكم عارفين كامل.
المهم واش راهو رايح يصرا من بعد؟ هل رايح يطلق سراح عمر ورضا الطالياني؟ وفي واش راهي تفكر ماروكو؟ و واش صرا لعايلة فا اليكول؟ هذا ما سنكتشفه في الحلقات القليلة القادمة
لقراءة الحلقة الثناش
http://omarizwit.blogspot.com/2013/04/blog-post_7646.html 
أو كل الحلقات من هنا
http://omarizwit.blogspot.com/2013/04/blog-post_3655.html
 

الحلقة العاشرة: عمر ازوط الحرّاق

الشعب يريد الأمن فالطريق...الشعب يريد الأمن فالطريق
هذا هو الشعار اللي كانت تنادي بيه ماروكو والمتعاطفين معاها لما زدموا على الشونطي تاع الميترو باش يديرو مظاهرة... في هذا الوقت الحساس تلقات ماروكو ميساج فالتلفون من رقم تعرفو مليح... رقم الميلينيوم تاع عمر اللي كانو يجيبو بيها الصباح دايما... ماروكو راسها دار ماحبتش تفتح الميساج... قالت كيفاش الشون تاع جيزي فالقبر ويحكم؟؟؟ مالا بعد تردد كبير، وبعدما خلقت المظاهرة وانسحبت منها (شعلت النار وجبدت روحها كي شغل واحدة نية) دخلت لصالون دو تي في ديدوش وقاعدة تخمم نفتح الميساج ولا ما نفتحوش؟ وبعد تردد كبير قالت نفتحو واللي صار يصير.
والميساج كان طويل ومكتوب بالعربية:

-->

حبيبتي ماروكو
أرجو أن تسامحيني على القلق اللي سببتهولك في الأيام القليلة الماضية، حيث أنو علابالي بلي بكيتي وندبتي عليا كي سمعتي بحادثة ازوط، بصح الحقيقة أنا مامتش... أنا مازالني حي بصح كان لازم عليا نلعبها ميت باش ما تبقاش عائلة سلمى السحارة تبع فيا وحابة تقتلني... من جهة واحدة أخرى أمي في السوق وأبي في البستان هبلوني، أمي حابة تزوجني بالسيف ببنت خالتي... وانا علابالك بلي ما نحملهاش... وسوق النسا هذا خاطيني... وهي كل يوم ياو واقتاش نشوفلك سندريلا بنت خالتك؟ بنت خالتك ونعرفها مليح... مربية علي يدي... اللي نعرفوها خير ماللي ما نعرفوهاش... راك راجل بشلاغمك ولازم تتزوج، واش يقولو علينا لافامي؟ وأبي يقولي ياراجل ما تلقاش خير من بنت عمك فلة شابة وتاع دار، وكل صباح بصنعة... راهي مسمية على اسمك من صغرها الطفلة ما تبهدلنيش، تحوس تديرلي العار مع خويا الملك؟ تحب مرت عمك يمات فلة مسكينة ما ترتاحش في قبرها وتضحك علينا مرت باباها الشريرة؟ وانا فالصح صبرت صبرت وطرطقت قلتلم أنا ما نتزوجش بسندريلا اللي تسهر للثناش تاع الليل برا، وما نتزوجش بفلة اللي عاشت مع سبع رجال في دار وحدة بلا ما تحشم على روحها، أنا نحوس على بنت الفاميلية... أمي في السوق قالتلي ما تحشمش تقول على بنت خالتك هكا؟ وأبي في البستان قلي ما تحشمش تهدر على بنت عمك هكا؟ ومنها تزايدنا بالهدرة وقررت نحرق من لالجيري كامل... أنا الآن راني بعثتلك ميساج وراني قريب نوصل للطاليان... تهلاي في روحك ماروكو... عمري ما ننساك.
وهذي هدية مني قصيدة كتبتها فالفلوكة اللي قريب غرقت بيا.
يا لفلوكة وصليني للطاليان
هناك نقدر ندير لافونير
ونرجع لحبيبتي في لمان
ماروكو محبوبة الجماهير.
نرجع ونديك معايا زكارة
ونروحو نعيشو في كندا
نهربو من سلمى السحارة
ونعيشوا في راحة وسعادة.
ماروكو كي قرات الرسالة تفكرت كامل لي مساج اللي كان عمر ازوط يكتبهم في فيسبوك على صفحة القصة الكاملة لعمر تاع كتاب القراءة، وعرفت بلي هذاك ماشي واحد منتحل الشخصية تاعو، هذاك عمر الحقاني... ماروكو خرجت تجري باش تفليكسي وتعيط لعمر... كي فليكسات عيطتلو صابت الرقم خارج الخدمة... هل وصل عمر للطاليان في أمان؟ هل حكموه شرطة الحدود؟
هذا ما سنعرفه في الحلقة القادمة
يمكنكم قراءة الحلقة الحداش من هنا
http://omarizwit.blogspot.com/2013/04/blog-post_2935.html
أو كل الحلقات من هنا
http://omarizwit.blogspot.com/2013/04/blog-post_3655.html
 

الحلقة التاسعة: طرطور أذكى الأذكياء

بعدما عرفنا فالحلقة الماضية أنو لانسبكتور الطاهر كلف نادين كبسولة الزمن باش تدي
القذافي لعام 1000 قبل الميلاد... نجو للحلقة اللي رايحة تكشف مصدر ثروة طرطور.
كونان بعدما عرف الحقيقة بلي ماروكو ما تقدرش تديرلو لافار مع نورة تحلب البقرة، قرر باش ينتقم منها مالا بدا يحوس على الأدلة اللي ممكن تخرج الناس المحبوسين في سركاجي على ذمة التحقيق و مع بداية التحقيق وصلو ايميل فيه فيديو خطير، بيه اكتشف كونان أنو طرطور الغبي اللي جامي نجح في خدمة، وجامي جا في منصب يسمحلو باش يسرق ويختلس، وماعندو حتى واحد يورث عليه، شارك في مسابقة تلفزيونية (رغم أنو حابس وما يعرف والو)... هذي المسابقة التي دايما تطرح أسئلة تعجيزية مثل: شكون جا اللول البيضة ولا الدجاجة، وهل البقرة سمينة ولا الزرافة طويلة، طرحت سؤال بقا حوالي 145 يوم واحد ما قدر يجاوب عليه، والسؤال كيما راهو يظهر فالتصويرة مباشرة من قناة عمر ازوط: حاجة كحلة صغيرة وتطير فالسما،
وهذا ملخص المكالمة

-->

ألو مين معانا؟
ياو معاك طرطور
طرطور؟ اسم ده ولا لقب؟
لالا ياو اسمي اسمي
اهلا بيك يا طرطور... بتكلمنا منين؟
ياو مالقزاير
(كونان لهنا تقلق وقال ديجا بدلت هدرتك يا المعفون)
اهلا بيك وبناس القزاير.... يلا يا طرطور سؤالنا سهل قدا حاجة سودا سغيرة وبتطير فالسما ايه هي؟ معاك عشرين سانية
ياو نملة شاربة ريد بول
نملة ايه؟
نملة شاربة الريد بووووووووووول ريد بول يعطيك جوانح...

المذيعة جاتها لانطونسيون كي سمعت الإجابة الصحيحة باسكو هوما يحطو غير الأسئلة اللي ما يقدر حتى واحد يجاوب عليها باش ينافيقو دراهم الاسماس والحشوة انهم دارو الجائزة 90000 دولار أمريكي...هكا اكتشف كونان بلي طرطور دراهمو نظاف وخاطيه عائلة فا اليكول الشريرة... مالا شرح لانسكبتور الطاهر الأمر وخرجو مالحبس... وهنا يولي المشكل تاع القاتل المحترف اللي كراتو عائلة فا اليكول باش ينفذ عملية ازوط.
على جانب أخر سمعت بلي ماروكو راهي بدات تحضر باش تدير مظاهرة ضد ارهاب الطرقات وتقطع طريق الميترو اللي مازال ما قلعش تنديدا بمقتل عمر.
الحاجة اللي واحد ما راه فاهمها مين ذاك عمر ازوط يدخل في صفحة القصة الكاملة لعمر تاع كتاب القراءة فالفسيبوك ويقول كلام ماش مفهوم: مثل سلكوني من سلمى السحارة، عاونوني باش تظهر الحقيقة، وواحد ماراهو فاهم إذا هذاك صح عمر ولا واحد منتحل الشخصية تاعو، وهل عمر راهو يتبع فالقضية ولا تمسخير من كاش واحد راهو يقصر؟ وهل راهو حي ولا ميت؟ وواش راهي رايحة تدير ماروكو بعد خرجة كونان الأخيرة؟
كل هذا سنعرفه فالحلقة القادمة التي ستكون أكثر الحلقات الصادمة في هذا الموسم.
يمكنكم قراءة الحلقة التاسعة من هنا
http://omarizwit.blogspot.com/2013/04/blog-post_436.html 
أو كل الحلقات من هنا
http://omarizwit.blogspot.com/2013/04/blog-post_3655.html
 

الحلقة الثامنة: حين تتحد الكبسولة مع سباك سباك

بعدما عرفنا بلي القذافي رسل تهديد مباشر عبر قناة الجماهيرية الى لانسبكتور الطاهر وقالو فيها بلي لوكان ما يطلقش سراح عائلة فا اليكول سيزحف عليه زنقة زنقة... بدا لانسكبتور في محاولة معرفة العلاقة بين عائلة أنانيش فا اليكول وعائلة القذافي، واتضح بعد تحقيقات معمقة وبمراجعة سلسلة الحفلات اللي أجراتها أخت سلمى فا اليكول الكبيرة امينة وردة الجزائرية، اتضح أنها احيات لانيفارسار تاع سيف الاسلام القذافي منذ سنوات ، ومنذ ذلك الحين وسيف الاسلام يعيطلها في كل المناسبات عيد المرأة عيد الشجرة عيد الطقل عيد اللجان الشعبية عيد البترول عيد السرقة عيد الاستثمار وكل الأعياد.... الحق يقال سيف الاسلام مالقري صليعة وماشي كامل شباب ومايعرفش يهدر وما فيه حتى صفة مليحة يقدر الفن الأصيل... أمينة غنات أغيتها الشهيرة: فورني عليا ببير بترول....والقذافي من كثرة ما يحب
يفورني على الفنانين اعتمد الأغنية شعار خاص بيه.

-->

المهم ما نطولش عليكم بزاف بحكايات سيف الإسلام ديجا على بالي بيكم عييتو وكرهتو، المهم لانسبكتور أمام هذا التهديد الوقح والدخول إلى مسرح سركاجي دون تيكيات تيكيات بيييييط، قرر يرد على القذافي رد يرجعه للقرون الوسطى اللي راهو عايش فيهم، والحل ساهل ماهل، أبال تيليفونيك يجيب يمات يماه داون داون داون.
وهكذا جبد لانسبكتور لابراي العجيبة تاعو اللي يتصل بيها مع الأشخاص المهمين: ألو ألو سبك سبك يعيط لصطاك صطاك صطاك صطاك ايل فو يريبدوني لراك طاك... نادين كبسولة الزمن هل أنت في الاستماع؟
واش لانسبكتور راني نسمع بيك واش راك وواش راهي المادام؟ ياخي عاش من سمع صوتكم؟
راني مليح الله يسلمك... كاين واحد البنادم كومبليكسيفا اوتس حبيت تحزكيه.
أنت تعيطلي غير فصوالحك؟ بصح معليش خير مرتك سابق ماننساش كي سلفتلي لاغوب بلونش باش تزوجت بسيلفر تاع عام 2500، شكون هذا اللي قلقك قولي عليه وضرك نماركيه في بي جي تاعي ونريقلو ماكاش مشكل؟
ياو هذاك الحزاك تاع القذافي، اوتس راه حاب يديرعليا باربو.
القذافي؟ هاهاهاهاهاهاهاها سأقضي عليه حالا بمحول الطاقة تاعي.
لالا انا ماحبيتكش تقضي عليه، حبيتك تجي بكبسولة الزمن وترميه في عام 1000 قبل الميلاد بيه بالخيمة تاعو.
هههيهههاهاهاه انك فووووووووور يا لانسبكتور، ما يكون الا خاطرك ضرك نتلهى بيه.
وهكذا نادين شعلت كبسولة الزمن تسخن شوية، دارت البروميار وقلعت للييبيا وبهذا انتهينا مؤقتا من القذافي.
لكن المشكل مازال في طرطور اللي راه يحقق معاه لابرانتي ما اعترف بوالو... وحسب أخر الاخبار كونان وصلاتو رسالة من طرف هام فالقضية يكشف حقيقة كبيرة، ياترى
شكون هذا الطرف؟ هذا ما سنعرفه فالحلقة القادمة.
يمكنكم قراءة الحلقة التاسعة من هنا
http://omarizwit.blogspot.com/2013/04/blog-post_436.html 
أو كل الحلقات من هنا
http://omarizwit.blogspot.com/2013/04/blog-post_3655.html

الحلقة السابعة: زنقة زنقة

بعدما شفنا فالحلقات الستة اللولين
عمر ضرباتو الطونوبيل في حادثة ازوط وماروكو حبيبتو كي سمعت كلفت كونان باش يحقق فالقضية ووعداتو تشوفولو نورة تحلب البقرة هو كي حقق اكتشف بلي سلمى فا اليكول كانت طايحة في عمر ازوط وتفاهمت مع دارهم باش تقتلو وكي اعتقلهم وداهم لسركاجي وحقق معاهم لانسبكتور الطاهر عرف بلي أنانيش عائلة فا اليكول كراو قاتل محترف باش ينفذ عملية ازوط... وكي بعث لابرانتي يحقق اكتشف بلي القاتل المأجور هو طرطور بياع الفول
نلحقو للحلقة السابعة وكيما قلنا لانسبكتور وصلاتو رسالة خطيرة فالتلفون وهي كالآتي:
اشعل التلفزيون ودير قناة الجماهيرية
لانسبكتور اللي جامي في حياتو شاف من خلاف اليتيمة قال واش كاين فالجماهيرية... وبعدما أمر لابرانتي باش يشعل التلفزيون ويدير قناة الجماهيرية صابو القذافي يخطب

-->

رسالة من ملك ملوك افريقيا
من إمام المسلمين مكتشف البيبسي وصديق تينكي وينكي ودبسي
من الرجل الذي طزطز ليزاميريكان وحشاها ليزافريكان
من صديق تنظيم القاعدة وتنظيم الراقدة
من الذي قرأ البقرة في ركعة و قتل نص ليبيا وما سالتلوش دمعة
من مكتشف أن المرأة قد تكون أنثى أو ذكرا ومن شتم الجزيرة ظهرا وعصرا
من منافس الفيس بريسلي فاللوك... و كاتب كتاب الأخضر بوك ومحرم استعمال الفيسبوك
من قائد جيوش المجموعة الشمسية و مؤسس الجماهيرية
من عاشق الممرضات الأوربيات و راكب سيارات أخر الموديلات
من الذي جاب انطوني كوين يمثل في عمر المختار وخلص ماردونا باش يدرب وليدو
بالدولار ومركع جبهاث الثوار والمستولي على البترول و الاستثمار
من الذي افتتح كأس العالم مع شاكيرا بأغنية زنقة واكا
الخ الخ الخ
الى المدعو لانسبكتور الطاهر
اذا لم يطلق سراح عائلة سلمى فا اليكول في آجل قدره يوم واحد فسأزحف عليكم زنقة
زنقة بيت بيت دار دار شبر شبر... وقد أعذر من أنذر
امضاء.... العقيد رئيس الجماهيرية الليبية الاشتراكية العظمى معمر القذافي

لانسبكتور لما شاف الخطاب هذا تغاشى... وبعد ما فطنو لابرانتي... بداو يفكرو واش هي العلاقة اللي تربط القذافي بعائلة فا اليكول واللي خلاتو يرسل تهديد صريح كيما هذا؟

هذه العلاقة سنكتشفها في الحلقة القادمة
يمكنكم قراءة الحلقة الثامنة من هنا
http://omarizwit.blogspot.com/2013/04/blog-post_549.html 
أو كل الحلقات من هنا
http://omarizwit.blogspot.com/2013/04/blog-post_3655.html