الحلقة العاشرة: عمر ازوط الحرّاق

الشعب يريد الأمن فالطريق...الشعب يريد الأمن فالطريق
هذا هو الشعار اللي كانت تنادي بيه ماروكو والمتعاطفين معاها لما زدموا على الشونطي تاع الميترو باش يديرو مظاهرة... في هذا الوقت الحساس تلقات ماروكو ميساج فالتلفون من رقم تعرفو مليح... رقم الميلينيوم تاع عمر اللي كانو يجيبو بيها الصباح دايما... ماروكو راسها دار ماحبتش تفتح الميساج... قالت كيفاش الشون تاع جيزي فالقبر ويحكم؟؟؟ مالا بعد تردد كبير، وبعدما خلقت المظاهرة وانسحبت منها (شعلت النار وجبدت روحها كي شغل واحدة نية) دخلت لصالون دو تي في ديدوش وقاعدة تخمم نفتح الميساج ولا ما نفتحوش؟ وبعد تردد كبير قالت نفتحو واللي صار يصير.
والميساج كان طويل ومكتوب بالعربية:

-->

حبيبتي ماروكو
أرجو أن تسامحيني على القلق اللي سببتهولك في الأيام القليلة الماضية، حيث أنو علابالي بلي بكيتي وندبتي عليا كي سمعتي بحادثة ازوط، بصح الحقيقة أنا مامتش... أنا مازالني حي بصح كان لازم عليا نلعبها ميت باش ما تبقاش عائلة سلمى السحارة تبع فيا وحابة تقتلني... من جهة واحدة أخرى أمي في السوق وأبي في البستان هبلوني، أمي حابة تزوجني بالسيف ببنت خالتي... وانا علابالك بلي ما نحملهاش... وسوق النسا هذا خاطيني... وهي كل يوم ياو واقتاش نشوفلك سندريلا بنت خالتك؟ بنت خالتك ونعرفها مليح... مربية علي يدي... اللي نعرفوها خير ماللي ما نعرفوهاش... راك راجل بشلاغمك ولازم تتزوج، واش يقولو علينا لافامي؟ وأبي يقولي ياراجل ما تلقاش خير من بنت عمك فلة شابة وتاع دار، وكل صباح بصنعة... راهي مسمية على اسمك من صغرها الطفلة ما تبهدلنيش، تحوس تديرلي العار مع خويا الملك؟ تحب مرت عمك يمات فلة مسكينة ما ترتاحش في قبرها وتضحك علينا مرت باباها الشريرة؟ وانا فالصح صبرت صبرت وطرطقت قلتلم أنا ما نتزوجش بسندريلا اللي تسهر للثناش تاع الليل برا، وما نتزوجش بفلة اللي عاشت مع سبع رجال في دار وحدة بلا ما تحشم على روحها، أنا نحوس على بنت الفاميلية... أمي في السوق قالتلي ما تحشمش تقول على بنت خالتك هكا؟ وأبي في البستان قلي ما تحشمش تهدر على بنت عمك هكا؟ ومنها تزايدنا بالهدرة وقررت نحرق من لالجيري كامل... أنا الآن راني بعثتلك ميساج وراني قريب نوصل للطاليان... تهلاي في روحك ماروكو... عمري ما ننساك.
وهذي هدية مني قصيدة كتبتها فالفلوكة اللي قريب غرقت بيا.
يا لفلوكة وصليني للطاليان
هناك نقدر ندير لافونير
ونرجع لحبيبتي في لمان
ماروكو محبوبة الجماهير.
نرجع ونديك معايا زكارة
ونروحو نعيشو في كندا
نهربو من سلمى السحارة
ونعيشوا في راحة وسعادة.
ماروكو كي قرات الرسالة تفكرت كامل لي مساج اللي كان عمر ازوط يكتبهم في فيسبوك على صفحة القصة الكاملة لعمر تاع كتاب القراءة، وعرفت بلي هذاك ماشي واحد منتحل الشخصية تاعو، هذاك عمر الحقاني... ماروكو خرجت تجري باش تفليكسي وتعيط لعمر... كي فليكسات عيطتلو صابت الرقم خارج الخدمة... هل وصل عمر للطاليان في أمان؟ هل حكموه شرطة الحدود؟
هذا ما سنعرفه في الحلقة القادمة
يمكنكم قراءة الحلقة الحداش من هنا
http://omarizwit.blogspot.com/2013/04/blog-post_2935.html
أو كل الحلقات من هنا
http://omarizwit.blogspot.com/2013/04/blog-post_3655.html