الحلقة الثالثة والعشرون: الحقيقة الكاملة لاي دادا

نرجعو شوية لماروكو .. حيث تركناها مسكينة حايرة في الطلبات اللي طلبتها منها خربوشة والمتمثلة في
أولا: بيضة تاع حصان ابيض.
ثانيا: جناح تاع بول دوغ يماه سلوقية. ثالثا: ناب مسوس تاع قرلو.
رابعا: حليب تاع الجاجة.
خامسا: زعانف تاع حلوفة عوامة.
وكل هذو لازم يكون عندهم كونت تاع فيسبوك.

-->

رجعت ماروكو بنفسية سيئة للدار... قالت واش داني نروح لهذي الشوافة... واش داني ندير على تامي... والله لوكان جات عندها زعانف تامي لوكان نحيتهمولها الحلوفة العوامة في الزيقوات ونقصت حاجة على روحي، الستوتة والله مانزيد نهدر معاها...ياربي كيفاش ندير يا ربي كيفاش ندير... ماروكو شعلت التلفزيون قالت نفاجي على خاطري شوية، تقلب في القنوات لقات قناة من هذوك تاع مكافحة السحر والشعوذة، ماروكو قالت أنا خلات عليا نسيي مع هذو وخلاص، كومبوزات النيميرو ردوا عليها:

السلام عليكم أخي في الله، أو أختي في الله... إذا كنت ذكرا اضغط على واحد وإذا كنتي أنثى اضغطي على اثنين.
ماروكو ضغطت على اثنين.

اختي في الله إذا كنتي من بلاد المسلمين اضغطي على واحد اذا كنتي من بلاد الكفار اضغطي على اثنين.
ماروكو ضغطت على واحد.

اختي في الله إذا كنتي في دولة عربية اضغطي على واحد اذا كنتي في دولة غربية اضغطية على اثنين.
ماروكو لهنا بدا يطلعلها القاز قالت: كي شغل ماعندكمش افيشور تعرفو منين راني نعيط؟ ديجا الرقم تاع الدزاير وحدو.

لا تزعفي أختي في الله نحن فقط نتأكد... اذا كنت من بلاد المغرب الاسلامي اضغطي على... ماروكو هنا تقاطعو.
اسمع ياو أنا مالدزاير وبركا ما تعيي فيا... عيطتلك نحوس على حجاب ماشي باش تديرلي انتيروقاسيون...واش راني في كوميسارية؟ ايا اخدم خدمتك وماتعيينيش بزاف.
يا أختي في الله خلينا نبروفيتي من مالك الذي هو مال الله... اذا كنت من ولاية الجزائر اضغطي...

اسمع لوكان ما تدخلش فالمفيد ضرك... والله غير نسبك.
خلاص خلاص... واش خصك؟
خصني حجاب.
حجاب على واش؟
على خربوشة.
خربوشة؟ واش داك ليها؟ هذيك مشعوذة خطيرة!
دمروني على راسي... مالا علاش راني نعيطلك انت... باش تديرلي حل.
اوكي اوكي... شوفي يا بنتي...ضرك نبعثلك الجوقة تاعي... تضربي فيها جدبة خربوشة ماتزيدش تدور بيك.
جدبة؟ حبيتني نجدب؟
اجدبي اذا راكي حابة تسلكي... زوج قنانين، وستة قطوطة وراكي سلكتي؟
ناكل القنين معليش بصح القطوطة؟ واش حسبتني شينوية؟
لالا ماشي تاكليهم يا مخلوقة... تجدبي معاهم هوما الجوقة... ورددي الجملة التالية: اي دادا اي دادا اي دا اي دا دا دا... خربوشة ماتزيدش تدور بيك.
اسمع هذي الهدرة لازم نونطريني عليها مليح... ارسلهالي ميساج باش نحفظها مابيد ترسلي الجوقة.
اوكي يا بنتي.

وهكذا بعث شيخ الفضائية الجوقة الجدبية لماروكو... وكيما راكم تشوفو فالشاشة ماروكو ضربت فيها جدبة... هكا رانا كشفنالكم سر اي دا دا الخطير... لكن هل راح تنجح الطريقة؟ هذا ما سنعرفه في الحلقات القادمة...