الحلقة السادسة عشر : خربوشة تلميذة زوينة.

بعدما عرفنا بلي تامي صحبت ماروكو جات ليها للدار وقاعدة توسوسلها بلي عمر دار لافار مع القاورية، وقالتلها بلي لازم تروح معاها للحمام يشوفو واحد الطيابة اللي رايحة تحللها هذا المشكل، نوصلو لهذي الحلقة اللي رايحة تصدمنا كامل وتخلينا نعرفو واش راهو يصرا في كواليس الحمامات حيث تنتشر
الطيابات بشدة.

ماروكو وتامي راحو للحمام تاع الحومة الدوزيام اللي وسمو حمام "اتنقى واترقى" واللي جامي ما دخلاتو ماروكو ، دخلو وحكمو بلاصة، استناو حتى تجي الطيابة وأثناء الانتظار دار هذا الحوار:

ماروكو: اسمعي هذا الحمام راه يبانلي بيزار، راكي سير من هذي البلاصة.
تامي: اسكتي علينا يا الجايحة، جبتك تديري لافار وتحوسي تبهدليني؟
ماروكو: لالا ماشي... كي شغل... جو سون كوم سي... جاغيف با... راني حاسة بلي...
تامي: اسمعي... أنا درت فيك مزية جبتك هنا وانتي راكي تتشنفي؟ ديري مليح في بالك بلي خربوشة ما تحبش التمسخير.
ماروكو: محشوشة؟ يا يما شكون هذي محشوشة؟
تامي: ياو خربوشة ماشي محشوشة يحشو راسك نشالله انتي و ازوط تاعك... هذي خربوشة الميور تاع الميورات، الفور تاع الفورات، نمبر وان في تجييح الرجال اللي يديرو القرون، ويحبو يلعبو بكعايلهم، شعارها البيت الشعري المأثور:

-->

اذا الرجل يوما أراد الخيانة
فلا حاجة لأن تحسي بالسخانة
جيبيلي تصويرتو يا مولات الخانة
وانا نرجعو كي الجاجة المشيانة

ماروكو: يا مامي يا مامي، اسمعي انا نخاف مالشوفات ربي يسترك ايا نروحو.
تامي: شواااااااافة؟ انتي حابة تجيبلينا البلا؟ مسلمين مكتفين مسلمين مكتفين... سامحوها يا سيادنا راهي جاهلة وما تعرفش السيستام.
ماروكو: انا السيستام اللي راني عارفاتو ضرك هو السيستام دالارم وضرك نشعلو لوكان ما تخرجينيش منا والله نتوغ ونعيط ونسمع الغاشي.
خربوشة: واش تسمعي يا لالة؟

وهنا تدخل خربوشة مزمجرة كالأسد تطير على فروطوار سحري، واضعة كاسكيطة على رأسها ونظارات جورجيو أرماني على عيونها الحمراء، وبعد أن سطاسيونات الفروطوار نحات لي لينات دو سول تاعها وضربت ماروكو بخزرة خلاتها تنقص خمسة كيلو فالميزان، طبعا راكم عارفين بلي ماروكو كانت تشطح بلا محارم مالخوف، في الوقت اللي كانت تامي تفتف في صدرها وتقول مسلمين مكتفين يا سيادي العارفين.

خربوشة مدت صبعها لماروكو وقالتلها كلام عرفت من خلالو بلي خربوشة مخنانة وعندها مشكل في نطق حرف الراء:

خربوشة: أنتي اللي ناكي حابة تشعلي السيستام دالانم، ياو ناكي غالطة بوووووواع... أنا خنبوشة واللي يغلط معايا ندينو فنيت اوملات بالفنوماج، واللي ما ناهوش عانف أنا عندمن قنيت... ينوح يسقسي خالتي زوينة اللي فتلت الطعام بالي تاع الميت وقتاش دنت عندها سطاج بناتيك بووووووواع.
تامي: لالة خربوشة ربي يسترك هذي راهي بوهالية وحابسة، وماتعرفكش اسمحليها وديري مزية.
ماروكو: ايه يا لالة طربوشة اسمحيلي.
تامي ضربت ماروكو بالكف على رقبتها وقالتها
تامي: من قبيلات محشوشة وضرك طربوشة انتي راكي حابة تطيبنا بربوشة ولا كيفاش؟
خربوشة: خين ما شقاك يا ماروكو؟
ماروكو: وتعرفي اسمي ثانيت اواااااااااااااااااه هذي امبوسيبل!
خربوشة: ناكي تتمسخني بيا؟ انا ناني عانفة بلي جيتي على جال عمن ازوط... احكي وندي بالك تكذبي عليا، والا ناكي عانفة واش نقدن نعمل لك ايا ازنبي بووووووووووواع.
تامي: بلا ما تتقلقي لالة خربوشة ضرك نحكولك كلشي.
تامي بدات تحكي في بلاصت ماروكو اللي كانت تبكي كعجايز الدوار... وبعدما صنعت مالحبة قبة وعظمت كلشي ورجعت ازوط خاين عشرة وغدار وعشاق قاوريات وهراب ولصقت فيه كامل الطبايع الشينين كي كملت هدرتها خربوشة جبدت الايفون تاعها ودارت جوجل ارث اديسيون شوافات وبدات تحوس على عمر ازوط.

ماذا اكتشفت؟ ماذا قررت؟ وواش هي الشروط تاعها؟ علاش تامي راهي تحوس تدخل بين ماروكو وعمر؟ هذا ما سنعرفه في الحلقات القادمة